மைலாஞ்சி – திரை விமர்சனம்

எழுத்தாளர் Ajayan Bala மற்றும் இசைஞானி Ilaiyaraaja இணைந்திருக்கிறார்கள் என்ற எதிர்பார்ப்போடு திரைக்கு வந்த படம் மைலாஞ்சி. ஆனால் அந்த எதிர்பார்ப்பை படம் நிறைவேற்றியதா என்பது கேள்விக்குறியே.

நாயகன் ஸ்ரீராம் ஒரு புகைப்படக் கலைஞன். குன்னூருக்கு வருகிறார். அங்கு நாயகியை சந்திக்கிறார். காதல் வயப்படுகிறார். ஆனால் நாயகியின் மனதில் வேறொருவர் இருக்கிறார். இது நாயகனுக்கு வேதனை தருகிறது. அதிலும் மேல், “என் காதலுக்கு நீயே உதவணும்” என்று நாயகி கேட்பது கதையை வழக்கமான பாதைக்கு இட்டுச் செல்கிறது.

ஹீரோ தனது காதலியின் இன்னொரு காதலுக்கு உதவ ஆரம்பித்தவுடன், இந்தக் கதை எங்கே போய் முடியும் என்பதை பார்வையாளர்கள் முன்கூட்டியே ஊகிக்க முடிகிறது. அதனால் திரைக்கதையில் சஸ்பென்ஸோ, சுவாரஸ்யமோ பெரிதாக உருவாகவில்லை.

நாயகனாக நடித்துள்ள Sriram நல்ல நடிப்பை வழங்க வேண்டும் என்ற ஆர்வம் தெரிகிறது. ஆனால் அவரது கதாப்பாத்திரம் அவருக்கு பெரிய ஸ்கோப் தரவில்லை. நாயகிக்கும் அதே நிலைதான். 

முக்கிய கதாப்பாத்திரங்களே மனதில் பதியாதபோது, துணை கதாப்பாத்திரங்கள் நினைவில் நிற்பது எப்படி?

இப்படத்தில் Singampuli மட்டும் அவ்வப்போது எனர்ஜி கொடுத்து சற்றே சலிப்பை உடைக்கிறார்.

இசைஞானி இளையராஜா என்ற பெயர் டைட்டிலில் இருக்கிறது. ஆனால் அவரது இசையின் தாக்கம் படத்தில் பெரிதாக உணரப்படவில்லை என்பது வருத்தம். ஒளிப்பதிவாளர் Chezhiyan பெயர் டைட்டிலில் தெரிந்தாலும், காட்சிகளில் நினைவில் நிற்கும் வித்தியாசம் குறைவாகவே இருக்கிறது.

நிகழ்காலத்தில் நடக்கும் கதைக்கு, இயக்குநர் அஜயன் பாலா கடந்த கால சாயலை கொடுத்து கதையெழுதியுள்ளார். அதனால் இன்றைய தலைமுறையுடன் படம் கனெக்ட் ஆகவில்லை. கதை சொல்லல், காட்சிமொழி, வசனங்கள், நடிப்பு, ஸ்டேஜிங் – எதிலும் புதுமை இல்லை.

மொத்தத்தில், மைலாஞ்சி மனதை கோர்த்துப் பிடிக்க வேண்டிய இடத்தில், மனதில் பதியாமல் வழுக்கி செல்கிறது.

மதிப்பீடு: 2 / 5 ⭐