உலகின் முதல் ரோபோடிக் ‘VEIL’ அறுவை சிகிச்சை: சென்னை அப்போலோ மருத்துவமனை புதிய சாதனை

சென்னை, மே 27: 

ரோபோடிக் உதவியுடனான புற்றுநோய் சிகிச்சையில் முன்னணி வகிக்கும் சென்னை அப்போலோ மருத்துவமனை, உலகிலேயே முதன்முறையாக ஹியூகோ ரோபோடிக்-அசிஸ்டெட் சர்ஜரி (RAS) அமைப்பைப் பயன்படுத்தி, பக்கவாட்டு அணுகுமுறை மூலமாக வீடியோ எண்டோஸ்கோபிக் இங்வினல் லிம்பாடெனெக்டமி (VEIL) அறுவை சிகிச்சையை வெற்றிகரமாக மேற்கொண்டு மருத்துவ உலகில் புதிய வரலாறு படைத்துள்ளது.

இந்த அறுவை சிகிச்சை 40 வயதுடைய ஆண்குறி புற்றுநோயால் பாதிக்கப்பட்ட நோயாளிக்கு மேற்கொள்ளப்பட்டது. அறுவை சிகிச்சைக்குப் பிறகு எந்தவித பெரிய பக்கவிளைவுகளும் இன்றி நோயாளி மிக விரைவாக குணமடைந்துள்ளதாக மருத்துவமனை நிர்வாகம் தெரிவித்துள்ளது.

ஆண்குறி, பெண்குறி வெளிப்பகுதி மற்றும் யோனி போன்ற பகுதிகளில் ஏற்படும் புற்றுநோய்கள் இடுப்பு இடுக்குகளில் உள்ள நிணநீர்முடிச்சுகளுக்குப் பரவும்போது, இங்வினல் நிணநீர்முடிச்சு அகற்றும் அறுவை சிகிச்சை அவசியமாகிறது. இதுவரை இந்த சிகிச்சை பெரும்பாலும் பெரிய கீறல்களுடன் திறந்தநிலை அறுவை சிகிச்சை முறையில் மேற்கொள்ளப்பட்டு வந்தது. இதனால் சரும சேதம், காயம் ஆறுவதில் தாமதம் மற்றும் நிணநீர் கசிவு போன்ற சிக்கல்கள் ஏற்படும் அபாயம் இருந்தது.

இந்நிலையில், ரோபோடிக் தொழில்நுட்ப உதவியுடன் மிகக் குறைந்த ஊடுருவல் முறையில் மேற்கொள்ளப்பட்டுள்ள இந்த புதிய VEIL சிகிச்சை மருத்துவ துறையில் முக்கிய முன்னேற்றமாக பார்க்கப்படுகிறது. சிறிய கீறல்கள் வழியாக துல்லியமான ரோபோடிக் கருவிகள் மற்றும் மேம்பட்ட கேமரா வழிகாட்டுதலுடன் அறுவை சிகிச்சை மேற்கொள்ளப்பட்டதால், உடல் திசுக்களுக்கு ஏற்படும் பாதிப்பு மிகவும் குறைக்கப்பட்டுள்ளது.

சென்னை அப்போலோ மருத்துவமனையின் சிறுநீரகவியல் மற்றும் ரோபோடிக் அறுவை சிகிச்சை நிபுணர் டாக்டர் என். ராகவன் கூறுகையில், “பல மாதங்களாக திட்டமிட்டு, துல்லியமாக செயல்பட்ட குழுவின் முயற்சியால் இந்த சாதனை சாத்தியமானது. உலகின் முதல் ரோபோடிக் பக்கவாட்டு VEIL அறுவை சிகிச்சையை வெற்றிகரமாக செய்தது மிகுந்த திருப்தி அளிக்கிறது,” என்றார்.

மேலும், ஆலோசகர் டாக்டர் மாதவ் திவாரி கூறுகையில், “நோயாளியின் விரைவான குணமடைதல் இந்த தொழில்நுட்பத்தின் திறனை நிரூபிக்கிறது. பக்கவிளைவுகளை குறைத்து, வேகமான மீட்சியை வழங்குவதில் இந்த முறைக்கு மிகப்பெரிய பங்கு உள்ளது,” என்று தெரிவித்தார்.

சென்னை மண்டல அப்போலோ மருத்துவமனையின் சிஇஓ டாக்டர் இளங்குமரன் கலியமூர்த்தி, “உலகத்தரம் வாய்ந்த சிகிச்சையை வழங்குவதில் அப்போலோ தொடர்ந்து புதிய உயரங்களை எட்டிக் கொண்டிருக்கிறது. மருத்துவ மேன்மை மற்றும் நோயாளி நலன் எங்கள் முதன்மை நோக்கமாகும்,” என கூறினார்.

டாக்டர் என். ராகவன் மற்றும் டாக்டர் மாதவ் திவாரி தலைமையிலான பல்துறை நிபுணர் குழுவினர் இந்த அறுவை சிகிச்சையை வெற்றிகரமாக மேற்கொண்டனர். மயக்க மருந்து ஆதரவை டாக்டர் பிரதீப் சிருவர் தலைமையிலான குழு வழங்கியது.

இந்த சாதனை, தொழில்நுட்ப உதவியுடனான துல்லியமான புற்றுநோய் சிகிச்சையின் எதிர்காலத்திற்கு இந்திய மருத்துவத் துறை எடுத்து வைத்துள்ள முக்கியமான முன்னேற்றமாக கருதப்படுகிறது.