எங்கள் தங்கம் - திரை விமர்சனம்
சாதுவாக இருக்கும் குடும்ப பெண் சமந்தா பேமிலிக்காக எடுக்கும் ஆக்சன் அவதாரம் தான் எங்கள் தங்கம்
நாயகி சமந்தா தன் கணவர் திகந்த் மஞ்சாலேயை காதலித்து கரம்பிடித்தவர். அதனால் திகந்த் மஞ்சாலே வீட்டில் சமந்தாவை யாருக்கும் பிடிக்காத ஒரு சூழல். இருந்தாலும் தான் சமர்த்துப் பெண்ணாக இருந்து வீட்டில் நல்லபெயர் வாங்குகிறேன் என கணவரிடம் சொல்கிறார் சமந்தா. அதற்கான முயற்சிகளையும் செய்து வருகிறார். இந்நிலையில் சம்ந்தாவின் பழைய வாழ்வில் சம்பந்தப்பட்ட சிலர் அவரை கொலைசெய்ய முயற்சிக்கின்றனர். அவர்களை ஒற்றை வுமனாக சமந்தா எப்படி எதிர்கொண்டார் என்பது படத்தின் கதை
ஒன்வுமன் ஆர்மியாக சமந்தா படத்தை தன் நடிப்பால் தாங்கியுள்ளார். சர்வ நிச்சயமாக சமந்தாவின் சண்டைக்காட்சிகளை நாம் பாராட்டியே தீரவேண்டும். தன் உடல் ரணங்களை பொறுத்துக்கொண்டு அவர் காட்டியிருக்கும் மாஸ் பெர்பாமன்ஸ் வேறரகம். திகந்த் மஞ்சாலே சமந்தா கணவராக மட்டுமல்ல சமத்தான கணவராகவும் நன்றாக நடித்துள்ளார். கெளதமி, ஆனந்த், ஸ்ரீ லக்ஷ்மி, குல்ஷன் உள்ளிட்ட பலரும் நல்ல நடிப்பை கொடுத்துள்ளனர்
ஓம் பிரகாஷின் ஒளிப்பதிவு படத்திற்கு பெரும்பலமாக அமைந்துள்ளது. சண்டைக்காட்சிகளில் அவரது டீம் வெறிகொண்டு வேலை செய்துள்ளனர். சந்தோஷ் நாராயணன் இந்த வாரத்தின் வெற்றிகரமான இசையமைப்பாளர் எனலாம். அருமையாக இசைத்துள்ளார். பாடல்களும் சிறப்பு
இயக்குநர் B V. நந்தினி ரெட்டி மேக்கிங்கில் அசத்தியிருக்கிறார். சின்னச் சின்ன எமோஷ்னல் காட்சிகளை ஒன்றிணைத்த விதம் பாராட்டுக்குரியது. முன்பாதியில் இருந்த நேர்த்தி பின்பாதியில் கூடிவராவிட்டாலும் அது பெருங்குறையாக தெரியவில்லை. சமந்தாவின் அட்டகாச ஆக்சனுக்காகவே படத்தை ஒருமுறை பார்க்கலாம்
Comments
Post a Comment