“அங்கீகாரம்” படத்தின் முதல் சிங்கிள் ‘சட்ட சட்ட சட்ட சான்றோரே’ வெளியானது

மனதை உலுக்கும் பாடல் ரசிகர்களை கவர்கிறது

ஸ்வஸ்திக் விஷன்ஸ் தயாரிப்பில் உருவாகியுள்ள “அங்கீகாரம்” திரைப்படத்தின் முதல் சிங்கிள் பாடலான “சட்ட சட்ட சட்ட சான்றோரே” வெளியாகி ரசிகர்களிடையே பெரும் வரவேற்பைப் பெற்று வருகிறது. டிரெய்லர் மூலம் ஏற்கனவே கவனம் ஈர்த்திருந்த இப்படம், தற்போது தனது வலுவான பாடல் மூலம் மேலும் எதிர்பார்ப்பை அதிகரித்துள்ளது.

‘Contempt of Time’ என்ற தலைப்பில் வெளியான இந்தப் பாடலுக்கு இசையமைப்பாளர் ஜிப்ரான் இசையமைத்துள்ளார். 

சமூக நீதி, சட்டம் மற்றும் மனித வாழ்வின் போராட்டங்களை மையமாகக் கொண்டு எழுதப்பட்டுள்ள இந்தப் பாடலின் வரிகளை கவிஞர் கார்த்திக் நேத்தா எழுதியுள்ளார். தனது தனித்துவமான குரலாலும் உணர்வுபூர்வமான பாடல்களாலும் ரசிகர்களின் மனதில் இடம்பிடித்துள்ள வைக்கம் விஜயலட்சுமி, இந்தப் பாடலை உருக்கமாகப் பாடியுள்ளார்.

பாடலின் ஒவ்வொரு வரியும் சமூகத்தின் பல்வேறு கேள்விகளை முன்வைத்து, அங்கீகாரம் பெற போராடும் மனிதர்களின் வலியை பிரதிபலிக்கிறது. வாழ்க்கை, நீதி மற்றும் சமூக அமைப்புகள் குறித்த சிந்தனைகளை தூண்டும் வகையில் பாடல் உருவாகியிருப்பது ரசிகர்களிடையே பாராட்டைப் பெற்றுள்ளது.

பல உண்மைச் சம்பவங்களை அடிப்படையாகக் கொண்டு, தடகள விளையாட்டை மையமாக வைத்து உருவாக்கப்பட்டுள்ள “அங்கீகாரம்”, விளையாட்டு வீரர்கள் எதிர்கொள்ளும் சவால்கள் மற்றும் விளையாட்டுத் துறையின் மறைக்கப்பட்ட உண்மைகளை வெளிச்சமிடுகிறது. தனது திறமைக்கு உரிய அங்கீகாரம் கிடைக்க நீதிமன்றம் வரை சென்று போராடும் ஒரு தடகள வீரனின் வாழ்க்கைப் பயணமே படத்தின் மையக்கருவாக அமைந்துள்ளது.

இப்படத்திற்காக சுமார் 75 லட்சம் ரூபாய் செலவில், உண்மையான நீதிமன்ற வளாகத்தைப் போல பிரம்மாண்ட செட் அமைக்கப்பட்டு முக்கிய காட்சிகள் படமாக்கப்பட்டுள்ளன. இந்த முயற்சி படத்தின் தரத்தையும், படக்குழுவின் அர்ப்பணிப்பையும் வெளிப்படுத்துகிறது.

படத்தில் கே.ஜெ.ஆர் கதாநாயகனாக அறிமுகமாகிறார். அவருடன் விஜி வெங்கடேஷ், அஜித் கோஷி, சிந்தூரி விஸ்வநாத், ஆண்டனி, ரங்கராஜ் பாண்டே, மன்சூர் அலிகான், மோகன்ராம் உள்ளிட்ட பலர் முக்கிய வேடங்களில் நடித்துள்ளனர்.

பா. ரஞ்சித் அவர்களிடம் துணை இயக்குநராக பணியாற்றிய தென்பாதியான் இப்படத்தை இயக்கியுள்ளார். ஒளிப்பதிவை ஏ. விஸ்வநாத், சண்டைக் காட்சிகளை பீட்டர் ஹெயின், படத்தொகுப்பை தினேஷ்குமார், கலை இயக்கத்தை ராமு தங்கராஜ், ஒலி வடிவமைப்பை சம்பத் ஆழ்வார், நடன அமைப்பை ஷெரீப் கவனித்துள்ளனர்.

பிரசாந்த், அஜித்பாஸ்கர் மற்றும் அருண்முருகன் ஆகியோர் இணைந்து தயாரித்துள்ள “அங்கீகாரம்” திரைப்படத்தின் முதல் சிங்கிள் தற்போது சமூக வலைதளங்களில் வைரலாக பரவி வருகிறது. டிரெய்லருக்கு கிடைத்த வரவேற்பைத் தொடர்ந்து, பாடலும் ரசிகர்களின் மனதை தொட்டுள்ள நிலையில், படத்தின் வெளியீட்டை எதிர்நோக்கி ரசிகர்கள் ஆவலுடன் காத்திருக்கின்றனர்.